LAOAG CITY – Inbatad ni Sang. Panlungsod Member Rbee Ablan ditoy ciudad ti Laoag a kas maysa a miembro ti LGBT ket malidayan iti inpiaay ni Presidente Rodrigo Duterte nga ‘absolute pardon’ kenni US Marine Lance Corporal Joseph Scott Pemberton a nangpapatay iti Filipina transgender woman a ni Jennifer Laude idi 2014.
Segun kenni Ablan, arig na saan unay a naikkan ti hustisya ti pannakatay ni Laude.
Nupay kasta, kunana nga adda ti bileg ni Presidente Duterte kas naisaguday iti Konstitusyon mainaig iti panangipaay na ti absolute pardon.
Inlawlawag ni Ablan a ti desisyon ni Presidente Duterte ket pinalen ken saanen a mabalin a kwestyunaran gapo ta addaan daytoy ti bileg.
Saan met a maibaga ni Ablan a nabayba-an ti kaso ni Laude gapo ta idi pinapatay ni Pemberton isuna idi 2014 ket nagna ti kaso ken nakunbiktaran idi 2015 ken nabalod.
Para kenni Ablan, saan a deserve ni Pemberton a maipaayan ti absolute pardon ngem adda ti poder ti presidente a mangipaay iti daytoy.
Mainaig iti daytoy, kuna ni Ablan a nasken kuma a naipaayan ti importasya ti kampo Laude ngem maawatan na ti Presidente gapo ta ti desisyon na ket naisaguday iti pamunganayan linteg ken kas maysa nga abogado.
Patyen ni Ablan a ti mabalin nga aramiden ti masungad a panawen ket maikkan ti hustisya dagiti biktima a miembro ti LGBT.
