LAOAG CITY – Nagballigi ti Sarrat National High School iti Hong Kong International Computational Robotics Olympiad 2024 a naiyuswat idiay Singapore.
Segun ken ni Dr. Marietta Yap, School Principal IV ti Sarrat National High School, napalaos ti ragsakda iti nagun-od a balligi dagiti 10 nga estudianteda no sadinno napadayawan ni Anne Gelyne Ruiz kas Overall Champion Gold Award iti Python Programming iti Senior Secondary pakairamanan da Aisen Rone Eirholf Baluan kas First Runner-Up Gold Award, Carl Melvic Hilario ken Arianne Nicole Rasalan nga agpada a nakagun-od ti Gold Award idinto a ni Hemdan Addiel Calipjo ket nakaala ti Gold Award iti benneg ti online.
Malaksid iti daytoy, inbatadna a nakagun-od met da Kyle Fernando Austria ken Jeshia Sabido ti Bronze Award iti Blockly Programming – Secondary 1.
Inpakaammo ni Yap a nagballigi pay da Myrelle Gaoiran, Asher Loran Grace Ganal ken Princess Althea Hermano iti Hong Kong International Science Olympiad 2024 idiay Singapore.
Mainaig iti daytoy, kuna ni Anne Gelyne Ruiz, Overall Champion Gold Awardee a ti dakkel a karit kadakuada ket ti time management gapu ta saanda a nakarebyu kabayatan ti school days no di ket idi nalpas ti School Year ket isu laeng ti panangrugida iti panagrebyu.
Kabayatanna, manamnama nga umawat ti Legendary Award dagiti Mathematics’ students ti Sarrat National High School inton Agosto 23 agingga 26 idiay Singapore.
Immuna iti daytoy, naipaayan ti pammigbig dagiti sangapulo nga estudiante iti Sangguniang Panlalawigan.
