LAOAG CITY – Irekreklamo ni Ms. Mildred Tawali iti ili ti Adams ni Sangguniang Bayan Member-elect Teddy Dupagen ken ti pamilya na gapo iti maipagarop a panangdangran da iti kabsat na.
Segun kenni Tawali, idi alas-diyes ti rabii ti Hunyo 16 ket nabartek ti kabsat na ken agsao-sao agingga nga adda ti arig na nagubor iti pagtaengan da.
Gapo iti daytoy, kunana a mavalin a gapo iti kinabartek ket bimmales met a nagbato ti kabsat na ken maipagarop a natamaan ti sarming da SBM-elect Dupagen.
Dinakamat na nga iti dayta a gundaway ket rimuar ni Dupagen ken ti pamilya na ken ditoy a maipagarop a dinangran da ti kabsat na.
Kunana a gapo iti daytoy ket nagsagaba ti sugat iti ulo rason a nadait, sugat iti likod, takyag ken barukong ti kabsat na.
Inadmitir ni Tawali a no mabartek ti kabsat na ket gagangay kenkuana ti agsao-sao.
Mainaig iti daytoy, inpetteng ni Tawali a saan a nasken a dangran ti maysa a sibilyan nangruna ket adda iti impluwensya ti nasanger ken maysa daytoy a naelektaran nga opisyal ti ili.
Inpalgak na a timmawag kuma laengen ti pulis ni Dupagen ken saan na nga ipan kadagiti ima na ti linteg.
Kabayatanna, ikarkarigatan met ti Bombo Radyo Laoag nga alaan ti komento ni SBM-elect Dupagen.
