LAOAG CITY – Napan in-validate ti CIDG ti maysa a security guard a naka-assign iti Department of Education (DepEd)-Ilocos Norte.
Daytoy ket kalpasan nga adda ti naawat da nga impormasyon nga adda ti ik-ikutan na a paltog a maysa a cal. 9mm.
Inbatad ni Police Chief Master Sergeant Joseph Califlores iti CIDG a nakikoordinar da a dagus iti mangimatmaton iti DepEd a ni Dr. Joan Corpuz, kasta met iti Police Provincial Office ken PNP-Laoag para iti panagturong da iti ayan ti nasao a security guard.
Inbaga na nga iti panagsaludsud da iti nasao a security guard no adda ti ik-ikutan na a paltog ket inpakita na a dagus ti cal. 9mm a service firearm da nga inted ti agency da ken nakumpirmaran nga awanan daytoy ti lisensya.
Naamoan a ti agency ti nasao a security guard ket ti 1980 Security Agency.
Innayon ni Califlores a gapu ta awan ti naipakita ti security guard a dokumento ti service firearm nga iggem na ket temporaryo nga inkustodyar da daytoy karaman ti nasao a paltog.
Kabayatanna, inbaga ti security guard iti Bombo Radyo a lima a bolan na pay laeng iti trabaho na iti DepEd-Ilocos Norte ken ti paltog ket pagsinsinnublatan da ti karelyebo na a security guard.
Kuna na a ti ammo da ket lisensyado ti service firearm da gapu ta adda met ti lisensya na kas security guard.
Inpakaammo pay ti guwardya nga intawag na iti boss na ti napasamak ngem maipagarop a nagunget ti maseknan ken kwinestyunaran na daytoy no apay inpakita na ti service firearm da.
Iti agdama, naiget ti panagim-imbestigar dagiti otoridad mainaig iti daytoy a banag.
