LAOAG CITY – Inpakaammo ni Bombo International News Correspondent Ryan Cristobal a nagbalin a naiget ti panagbantay dagiti kapulisan iti umuna nga aldaw a pannakaisayangkat ti 2024 Paris Olympics.
Segun kenkuana, sipod pay idi Hulio 18 ket nangrugin ti pannakaipatungpal ti naiget a pagannurutan para iti naindaklan nga aktibidad iti lubong ti ay-ayam iti intero a lubong.
Inbatadna nga adda ti QR Code a nasken a maipakita sakbay a a sumrek iti nasao nga sporting event kas maysa kadagiti wagas a maipasigurado ti kinatalged dagiti makipaset nga umaayam, coach, technical officials, dagiti mapan agbuya ken dadduma pay.
Kunana a dupudop dagiti tattao idiay Paris ita a bulan gapu ta adu dagiti nagbakasion iti lugar.
Inlawlawagna nga adda pay dagiti maawatda nga announcement manipud kadagiti notifications kadagiti online account-da.
Innayonna a gapu iti naruay a tattao iti sporting event ket adda met latta dagiti sumagmamano a mabalin a mananggundaway kadagiti bisita wenno turista.
