LAOAG CITY – Kinontra ni Senador Christopher “Bong” Go ti akusasyon kontra kenkuana ti Office of the Prosecutor ti International Criminal Court (ICC) no sadinno nga innaganan da daytoy kas co-perpetrator wenno kakunsabo ni dati a Presidente Rodrigo Duterte iti kaso a crimes against humanity nga adda ti pakainaigan iti nadara a war on drugs.
Iti inparuk-at nga statement ti Senador ita a rabii ti Sabado, Pebrero 14, inbatad na nga ita na laeng a naamoan seknan kadagiti alegasyon a maibatbato kontra kenkuana a nakailanad iti redacted version ti Document Containing the Charges nga inisyu ti International Criminal Court manipod iti Office of the Prosecutor.
Naiget a naglikudan ti Senador dagiti alegasyon kas naan-anay nga awan ti pagibasaran, adda ti kankanunungan na, saan a patas ken awan ti pakainaigan iti nagbalin a papel ken responsibilidad na idi nagserbi kas Special Assistant ni dati a Presidente Duterte manipod Hunyo 2016 agingga iti Oktubre 2018 kasta met idi nagserbi daytoy kas Executive Assistant to the Mayor ti Davao City manipod 1998 agingga iti 2016.
Naglikudan pay ti Senador ti saan nga umiso nga akusasyon a nagserbi kas Chief of the Presidential Management Staff, gapu ta kaanuman ket saanna nga iniggaman ti nasao a posisyon.
