LAOAG CITY – Pormalen nga inawat ni Sen. Francis ‘Chiz’ Escudero ti inpatulod a show cause order ti Commission on Elections (Comelec) kontra kenkuana mainaig iti P30 milyon a balor ti donasion a maipagarup nga inawatna iti napalabas a 2022 elections.
Inbatadna a ti panangawatna iti pammilin ti komision ket tsansa tapno maipakitana nga awan ti linabsingna nga uray aniaman a linteg iti napalabas nga eleksion.
Inlawlawagna a nakasagana a sumungbat ken ipakita a saan a pudno dagiti alegasion ken akusasion a maibakbakal kenkuana mainaig iti panangawatna ti donasion.
Maipalagip nga idi Sabado ket nangipila ti maysa a show cause order ti Commission on Elections kontra ken ni Escudero a gagemna nga agpalawag ti Senador maipanggep iti nasao a gatad.
Basar iti Article 11 of the Omnibus Election Code, naiget a maipawpawil kadagiti kontraktor pakairamanan dagiti sub-contractors a mangipaay kadagiti donasion kadagiti agpapaay ti gobierno.
