LAOAG CITY – Madanagan ni Sen. Imee Marcos kadagiti damag nga addan dagiti mannalon a maipagarup a pagsarsardengen iti panagmula ken makapaspasar ti pammutbuteng tapno mapaalisto ti land conversion kadagiti lugar a maapektaran ti Pax Silica Project idiay Capas, Tarlac.
Gapu iti daytoy, nagpanawagan ni Marcos ti imbestigasion ken naurnos a palawag manipud iti Bases Conversion and Development Authority (BCDA) iti pudno nga agbalin nga epekto ti proyekto kadagiti residente a maapektaran daytoy sakbay nga iwayat ti land acquisition.
Inpetteng ti Senadora a saan nga umno ti inkari a billion dollars a puunan ken trabaho no ti kasukatna daytoy ket ti pagsapulan dagiti mannalon ken dagiti katutubo nga Aeta a mangmangged iti lugar.
Innayonna a saan a mabalin nga ikkaten ti pagsapulan dagiti mannalon a mangpakpakan iti komunidad a saan man laeng a maipaayaan ti umdas a palawag.
