LAOAG CITY – Inrekomendar ni Senate Minority Leader Vicente “Tito” Sotto III nga iyakar iti “Committee of the Whole” ti imbestigasion iti napasamak a panagpinnutok ti paltog iti Senado idi Mayo 13 tapno amin a senador ket makipaset iti maymaysa a panagdengngeg.
Inbatadna a saan laeng a para iti majority wenno minority ti nasao a banag gapu ta sibubukel a Senado ti naapektaran ti insidente nangruna maipapan iti seguridad ken integridad ti institusion.
Ti singasing ket rimmuar kalpasan ti emosional a panagsinnukat iti plenario pakairamanan ti nagbalin a reaksion ni Sen. Pia Cayetano iti rakurak ni Sen. Risa Hontiveros nga arig “awan ti napasamak” kalpasan ti insidente.
Inlawlawag ni Hontiveros a ti rakurakna ket mangdakdakamat iti nagbalin a sungbat ti Senado kas institusion ken saan nga iti buteng ken emosion dagiti tao a direkta a naapektaran ti insidente.
Kuna ni Senate President Alan Peter Cayetano a pagsasaritaanda pay laeng a senador ti singasing sakbay nga agdesision no maaddaan ti pinagtipon nga imbestigasion.
