LAOAG CITY – Nagpila ni Senate Majority Leader Juan Miguel “Migz” Zubiri ti maysa a gakat a gagem na nga i-reset ti kaunaan a parliamentary elections ti Bangsamoro Autonomous Region in Muslim Mindanao (BARMM) intono Marso 30, 2026.
Ilunglungalong ti Senate Bill No. 1587, ti pannakaamendar ti Bangsamoro Organic Law (BOL) tapno malawlawagan ti legal a pagibasaran ti eleksyon ken ikeddeng ti panangrugi ti termino dagiti maelektaran nga opisyal iti Abril 30, 2026.
Naipalaon pay iti gakat ti panaggigiddan dagiti sumaruno nga eleksyon iti BARMM iti national election intono 2028 ken iti kada tallo a tawen kalpasan iti daytoy.
Segun ken ni Zubiri, nasurok nga innem a tawenen sipud nabuwangay ti BARMM ngem saan pay a nakabotos dagiti umili para kadagiti bukod da a lider, banag a maikontr iti gagem ti bukod a mangiwanwan ken agdesisyon ti rehiyon.
Innayon ti senador a nagbalin a rason ti pannakaitantan dagiti desisyon ti Korte Suprema a panangikkat iti Sulu kas paset ti BARMM ken nangibasura iti 2025 redistricting law ti Bangsamoro Parliament, a nangitunda iti baro a panagsagsagana kadagiti distrito ken istruktura ti eleksyon.
Iti babaen ti gakat, agtalinaed pylaeng ti Bangsamoro Transition Authority kas temporary a gobierno agingga a maelektaran ken makatugaw dagiti baro nga opisyal iti babaen ti automated election.
