LAOAG CITY – Inpasigurado ni Senate Secretary Renato Bantug Jr., ti kinasagana iti seguridad ti Senado no bilang mapanunot ni Vice President Sara Duterte a sumango iti impeachment trial daytoy.
Maipalagip nga idi pangaldaw ti Martes ket kellaat a simmangpet iti Senado ni Vice President Sara tapno makitaripnong iti defense team-na ngem saan daytoy a simmango iti panangusig kenkuana.
Inbatad ni Bantug a karaman iti napagsasaritaan iti coordination meeting ti security arrangement no bilang agatendar ti Bise Presidente aniaman iti aldaw ti panangusig kenkuana no sadinno a nagatendar ditoy ti Chief of Staff ni Vice President Sara a ni Atty. Zuleika Lopez.
Inlawlawagna a kanayon a nakasagana ti protocol office-da tapno makaipaay ti naan-anay nga assistance aniaman nga oras a ma-notify isuda iti panagsangpet ti Bise Presidente.
Iti agdama, kunana nga awan pay ti abiso no agatendar ni Vice President Sara iti impeachment trial inton Martes no sadinno a pinaayaban ti prosekusion ti Chief of Staff-na a ni Lopez.
Innayonna a saan a napagsaritaan ti taripnongda maipanggep iti impeachment trial.
