LAOAG CITY – Nangipasa ti Senado ti maysa a resolusion nga agpanpanawagan iti Pasig Regional Trial Court nga ibabawi ti inparuk-at a temporary restraining order (TRO) iti P85 a nayon a sueldo iti inaldaw a sueldo dagiti mangmangged iti Metro Manila.
Suportado ken pinirmaan ti 21 a Senador ti inaprobaran a Senate Resolution 577 a ti author ket ni Senate Majority Leader Migz Zubiri.
Naipaganetget iti resolusion a baybay-an ti korte nga ipatungpal ti nayon a sueldo a pammiilin ti Regional Tripartite Wages and Productivity Board wenno wage board para iti 1.1 million a minimum wage earners iti National Capital Region (NCR).
Malaksid a kasapulan daytoy dagiti mangmangged ken ti pamiliada, inpetteng dagiti Senador nga ipawil ti maipatpatungpal a labor code ti aniaman a korte ken tribunal a mangiyisyu ti aniaman a preliminary wenno permanent injunction wenno TRO kontra iti aniaman a proceedings ti national ken regional wage boards.
Inlawlawag ni Zubiri a saan a konkontraen ken saan a manmandaren ti Senado ti korte no diket umap-apela laeng dagiti agpanpanday linteg nga ibabawi ti temporary restraining order tapno naan-anayen a maipatungpal ti nayon a sueldo.
