LAOAG CITY – Nagpanawagan ni senador Erwin Tulfo kadagiti kakadwa na iti senado nga iyalisto ti panangrepaso iti Oil Deregulation Law, kalpasan ti agtultuloy a kinangato ti presyo ti langis gapu iti tension iti Middle East.
Segun ken ni Tulfo, dehado dagiti Pilipino iti maipatpatungpal a linteg gapu ta limitado ti bileg ti gobierno iti panangkontrol ti presyo ti produkto a petrolyo.
Innayon na nga iti babaen ti agdama a sistema, mabalin nga umapela ti gobierno kadagiti oil companies a saan unay nga ipangato ti presyo no ngumato ti presyo ti langis iti world market.
Mainaig iti daytoy, sinuportaran ni Tulfo ti inpila ti pada na a senador a ni Senator Sherwin Gatchalian a Senate Bill No. 641 wenno institutionalizing Transparency in the Philippine Downstream Oil Industry tapno marepaso ti Republic Act (RA) 8479.
Gagem ti gakat a makita ti “unbundled prices” wenno detalyado a presyo dagiti kumpanya ti langis tapno agbalin a nalawag iti publiko ti breakdown ti presyo.
