LAOAG CITY – Naikabilen iti New Quezon City Male Dormitory Jail kalpasan ti boluntaryo nga isusuko ni Senador Jinggoy Estrada.
Pasado alas-8 idi rabii, Hunyo 1 a dimteng ti senador iti Quezon City Jail iti Payatas, Quezon City.
Maipalagip a boluntaryo a simmuko ti senador sumagmamano nga oras kalpasan a nangiparuk-at ti Sandiganbayan Fifth Division ti warrant of arrest gapu iti kaso a plunder.
Dimmalan pay daytoy iti proseso iti babaen ti panangala kadagiti fingerprints ken mugshots iti head office ti Criminal Investigation and Detection Group (CIDG) iti Camp Crame.
Kalpasan iti daytoy ket insubli ti Criminal Investigation and Detection Group ti senador iti Sandiganbayan para iti return-of-warrant no sadinno a nagdesisyon da nga iti Quezon City Jail ti pakaibaludan ni Estrada.
Maipalagip nga ita nga aldaw ti Lunes a rimuar ti warrant of Arrest manipod iti Sandiganbayan kontra kada Estrada ken ni dati a Department of Public Works and Highways (DPWH) Secretary Manuel Bonoan gapu iti kaso a plunder mainaig iti maipagarop a maanomalya a flood control projects.
