LAOAG CITY – Inpaganetget ni Senate President Chiz Escudero a saan a mabalin a piliten dagiti senator-judges nga ag-inhibit iti impeachment trial kontra ken ni Vice President Sara Duterte.
Daytoy ket adda ti pakainaiganna iti apela dagiti sumagmamano nga indibidual ken ti plano ti prosecution panel a mangipila ti mosyon nga agkidkiddaw nga ag-inhibit dagiti senator-judges a mangipakpakita ti bias iti panangtingiting.
Inbatad ni Escudero, mabalin a kiddawen ti recuse wenno panag-inhibit ti maysa a senator-judge ngem desision latta dagiti senator-judges no aramidenda daytoy.
Inlawlawagna a saan a mabalin a pagdesisionan ti impeachment court ken pagbutosan nga ikkaten ti maysa a senator judge a ti panagkitada laeng ket impartial iti kaso.
Kunana nga awan ti kastoy a procedure wenno proseso iti impeachment court man wenno iti regular a korte.
