LAOAG CITY – Kinettel ti maysa a senior citizen ti bukudna a biag iti ili ti San Nicolas.
Ti biktima ket maysa a lalaki nga agtawen ti 72, balo ken residente iti nasao a lugar.
Segun ken ni Mrs. Amancia Celderon, kabsat ti biktima, apaman a nakasangpet ti kaanakanna iti pagtaengan ti biktima ket ditoy a nakitana a nakabitinen ti ulitegna a nakatali ti nylon ti tengngedna iti kuartona.
Inbatadna a saan daytoy ti umuna a daras a ginandat ti biktima a kettelen ti bukudna a biag no sadinno nga adda ti gundaway a nangala lattan ti rigis ken kellaat nga inpulipotna iti tengngedna ken adda pay ti panaggandatna a tagbaten ti bagina babaen ti buneng ngem naanawada daytoy.
Inlawlawagna nga awan met dagiti ibagbagana nga aniaman a problema a mabalin a rason tapno aramidenna ti insidente.
Nupay kasta, inpakaammo ni Celderon a nadakamat kenkuana ti kabsatna nga adda dagiti gundaway nga agpatpatnag a saan a makaturturog daytoy.
Innayonna a pinadasda met nga ipaagas ti kabsatna ngem awan met ti nakita ti doktor a sagsagabaenna a sakit.
