LAOAG CITY – Nakita a maysan a nalamiis a bangkay ti senior citizen iti kataltalonan iti Brgy. 11 Bulbulala iti ili ti Vintar.
Nabigbig ti biktima a ni Luzviminda Jose Gangani, agtawen ti 65, addaan ti live-in partner, housekeeper ken residente ti Brgy. Tanggaoan iti ili ti Piddig.
Segun ken ni P/Capt. Jofel Pascual, Hepe ti Vintar Municipal Police Station, nakita ni Mr. Joseph Morales Edrozo, agtawen ti 44, mannalon, naasawaan ken residente ti Brgy. 11 Bulbulala iti ili ti Vintar ti nasao a bangkay ti baket a dagusna nga in-report iti kuerpo ti pulisia.
Gapu iti daytoy, dagus a nagresponde ti kapulisan kaduana ti Rural Health Unit iti ili ti Vintar nga indauloan ni Dra. Heidi Albano, Municipal Health Officer.
Basar iti naiwayat nga imbestigasion, timmawag ti biktima ken ni Mrs. Noralyn Gangani Agbayani, anak ti biktima a mapan iti pagtaenganda tapno mangala ti saluyot.
Nupay kasta, masdaaw ni Mr. Demetrio Mariano Antonio, live-in partner ti biktima isu a tinawaganna ti anakna a ni Noralyn no nakitana ti inana ngem saan daytoy a simmungbat.
Mainaig iti daytoy, maibasar iti medical examination ti biktima babaen ken ni Dr. Albano ket natural death ti nangitunda ti pannakatay ti biktima.
Naammoan a basar kadagiti kabagian ti biktima, aguy-uyek ken aggurgurigor daytoy ken adda pay ti high blood pressure-na.
Kabayatanna, mamati ti maseknan a pamilia nga awan ti foul play a napasamak iti insidente ken nagkedked dagitoyen a maipadalan iti autopsy examination ti bangkay ti biktima.
