LAOAG CITY – Agikkaten ni Evan Fournier iti National Basketball Association (NBA) kalpasan ti 12 season a panagay-ayam.
Iti agdama, adda iti unrestricted free agent ni Fournier kalpasan a nagkedked isuna ti indiaya ti Detroit Pistons a $19 million contract para iti 2024-2025 season.
Idi Pebrero 2024, napan isuna iti Detroit kas paset ti Bojan Bogdanovic deal ngem pinilina a serreken ti free agency.
Basar iti opisial a report ti NBA, agay-ayam ni Fournier iti Greek powerhouse team nga Olympiacos. Immunan a nagpirma ti kontrata ti batikan nga NBA player iti nasao a koponan nga agbalor ti $4 million para iti dua a tawen.
Iti umuna a season daytoy iti NBA, naaramidna nga ag-average ti career-high nga 18.5 points per game ngem kalpasan a nairaman isuna kadagiti sumagmamano a trade deal ket in-inot a bimmaba ti maiserserrekna a points per game.
Naammoan nga isuna ket paset ti NBA draft 2012 ken pinili ti Denver Nuggets kas first-round pick. Saan met a nagbayag iti Nuggets ken naikabil iti Orlando Magic no sadinno a nagbayag isuna.
Manipud iti Orlando, napan isuna iti Boston Celtics ngem saan a nagbayag ket na-trade iti New York Knicks.
Kabayatan ti kaaddana iti Knicks, naaramidna ti franchise record para iti kaadduan a 3-pointer iti maysa a season a 241.
Maipalagip nga iti napalabas a 2024 Olympics, nagbalin a paset ni Fournier ti French basketball team ken nakaaramid ti 9.8 ppg ken 2.2 apg.
