LAOAG CITY – Inpasingked ni Mrs. Ligaya Barruga, Fishery Regulatory officer ditoy ciudad ti Laoag nga awan ti masapol a pagdanagan dagiti umili gapo ta naiget ti inspeksyon ti BFAR kadagiti maibyahe a shellfish manipod iti probinsia ti Pangasinan.
Daytoy ket kalpasan nga ada ti rimwar nga advisory manipod ti Department of Agriculture (DA) nga ada ti nagpositibo ti paralytic poison a shellfish manipod iti nasao a probinsya.
Segun kenni Barruga, ada dagiti wagas nga ubraen dagiti technical staff ti BFAR tapno madeterminar no positibo daytoy ti paralytic shellfish poisoning wennu ti makunkuna a red tide.
Innayon pay ni Barruga a linawas a mangmangted ti BFAR ti report kadagiti Agriculture Office ken Health Offices no adda dagiti nakadanunen a shellfish nga apektado ti nasao a poison.
Naamoan a ti maysa a rason no apay nga adda ti kastoy a pannakasabidong dagiti shellfish ket ti kalidad ti danum; a mabalin a narugit.
