LAOAG CITY – Inikkaten ti Bureau of Fisheries and Aquatic Resources (BFAR) ti shellfish ban idiay Daram, Samar kalpasan ti agarup binulan a panangipawil kagiddan ti tallo a nagsasaruno a lawas a negatibo iti toxin a mangituntunda ti paralytic shellfish poisoning dagiti inwayat a panangtingiting.
Naiyetnag ti shellfish ban kalpasan a nagpositibo iti red tide dagiti shellfish samples nga innala iti lugar idi immuna a paset ti Mayo.
Inbatad ti Bureau of Fisheries and Aquatic Resources nga agtultuloy ti regular daytoy a monitoring kadagiti kabaybayan a sakupen ti Daram tapno mabantayan ti posible a panagsubli ti red tide.
Kabayatanna, nagtalinaed a maipatpatungpal ti shellfish ban iti Irong-Irong Bay idiay Catbalogan City, Samar; iti kabaybayan ti Biliran Island idiay Biliran; iti Matarinao Bay a sakupen dagiti ili ti General MacArthur, Quinapondan, Hernani ken Salcedo idiay Eastern Samar pakairamanan ti Dumanquilas Bay idiay Zamboanga del Sur ken Tantanang Bay idiay Zamboanga Sibugay gapu ta nagtalinaed a positibo iti red tide toxins dagiti sample ti danum iti baybay ti shellfish.
