LAOAG CITY –Patien ni Department of the Interior and Local Government (DILG) Secretary Jonvic Remulla a dakkel ti tsansa a matiliw iti mabiit ti naglibas a ni Senador Ronald “Bato” dela Rosa ken ni dati a Cong. Zaldy Co ditoy pagilian.
Iti interview ni Remulla kalpasan a napagsaritaan ti 2027 budget ti DILG iti Senate Committee on Finance, umad-adu ti tsansa a matiliw ni Dela Rosa, nangruna ta immunan nga impakaamo ti sekretario nga adda protektor ti naglibas a senador.
Nupay kasta, nagkedked ni Remulla a mangibaga no ania wenno siasino ti agserserbi kas protector ni Sen. Bato gapu ta kompidensial daytoy ken mabalin a ma-jeopardize ti operasionda.
Kabayatanna, kinuna pay ni Remulla a ti mision ti panagbiahena idiay France ket ti panangisubli ken ni Co iti pagilian.
Impetteng ni Remulla nga ammodan ti ayan ni Co, ti adres ken pagtaenganna.
Iti sumaruno a dua a lawas, kalikagum ni Remulla ti agturong idiay Lyon, France, kangrunanna ta adda marching orders ni Presidente Bongbong Marcos a mangisubli ken ni Co iti pagilian iti babaen ti aniaman a pamay-an a kasapulan.
