LAOAG CITY – Inpetteng manen ti Malakanyang a ti liderato ni Acting Senate President Sherwin Gatchalian ti bigbigbigen ti ehekutibo.
Reaksion daytoy ti Palasyo kalpasan nga inlungalong ti kampo ni Sen. Alan Peter Cayetano ti maysa nga “interim arrangement” wenno temporario a sistema iti panangidaulo ti Senado tapno maprotektaran dagiti empleado daytoy iti baet ti riribok iti liderato.
Inbatad ni Palace Press Officer Atty. Claire Castro nga awan ti maitulongna iti agdama ti kastoy a klase nga arrangement.
Kunana a posible a maulit laeng ti napasamak idi iti House of Representatives no sadinno a saan a tinungpal nga insigida ni Cayetano ti term sharing agreement-da ken ni Cong. Lord Allan Velasco.
Iti babaen ti singasing nga interim arrangement ti kampo ni Cayetano, mangipatungpal ti “dual-signatory” wenno “joint-certification” mechanism wenno dua a pirma para kadagiti disbursement, checks, vouchers, kontrata ken dadduma pay a napapateg a dokumento nga adda ti pakainaiganna iti operasion ti Senado ken Impeachment Court.
