LAOAG CITY – Madanagan ti Malacañang kadagiti rakurak ni Davao City Congressman Paolo Duterte nga arig mangipakpakita ti kinakurang ti panagkaykaysa ditoy Pilipinas ken ad-adda a nakapokus iti sabali a pagilian.
Daytoy ket kalpasan nga inakusaran ni Duterte ni Defense Secretary Gilbert Teodoro a maipagarup a “demonizing” iti China ken arig mangipatpatungpal ti loyalty test.
Inbatad ni Palace Press Officer Atty. Claire Castro a ti mapagsasaritaan ket saan a maipanggep iti loyalty no diket ti takder iti tunggal Pilipino para iti bukud a pagilian.
Inlawlawagna a makaalarma ti maysa nga agpanpanday linteg kas ken ni Duterte ket arig mangipasimudaag ti saan a natibker a pakabigbigan iti pagilian.
Kunana nga awan ti makitana a biddot iti nagbalin a rakurak ni Teodoro gapu ta nalawag a mangipakpakita ti panagayat iti Pilipinas.
Inpetteng ti Malacañang a ti maipapan iti relasion iti China ket agsina iti isyu ti panangilaban iti nailian nga interes.
Balakad ni Castro, no adda dagiti agpanpanday linteg nga adda ti opinyon a kapada ni Congressman Pulong Duterte, nasaysayaat a dumatagda tapno makita no asino ti agay-ayat iti Pilipinas.
