LAOAG CITY – Inpakaammo ni Barangay Chairman Avelino Pasion iti Barangay Pasiocan iti ili ti Bacarra a nakalockdown ti Sitio 6 iti nasao a barangay gapo iti panagpositibo ti dua a residente no sadinno a ti maysa ket ROF.
Segun kenni Pasion, agarop 50 a pamilya ti apektado iti nasao a lockdown.
Inbatad ti kapitan a ti asawa ni IN-C514 ket naswab test ita nga aldaw tapno maamoan no nakaptan daytoy ti virus.
Kunana pay a ni IN-C515 nga agtawen ti 47 ket su ti nangtaripato kadagiti agasawa idi simmangpet da ditoy probinsya.
Inlawlawag na nga idi parbangon ti Domingo ket naulaw ti lakay isut gapo na a naitaray daytoy iti ospital ken adda dagiti tattao a timmulong ken dagiti kabagyan da ken dagitoy ti karaman kadagiti nakapulapol ti pasyente.
Karaman kadagiti nacontact trace ken agdama a naka-quarantine ket ti maysa a kagawad, maysa a tanod, dua nga ipag ti tanod ken dati a kagawad a timmulong idi naitaray iti ospital ti pasyente.
