LAOAG CITY – Maysa a pedaso ti Flamin’ Hot Cheeto nga agsukog ti Pokémon character a ni Charizard ti nailako iti auction iti dakkel a gatad nga $87,840 wenno katukad ti P5 million.
Basar iti Goldin auction house, nangrugi ti bidding iti $250 idi Pebrero.
Nupay kasta, gapu ta naisangsangayan ket dimmanon daytoy ti $72,000 agingga iti pakabuklan nga $87,840.
Ti 3-inch na Cheeto nga inawagan a “Cheetozard,” ket naikabil pay iti custom Pokémon-style card ken naipan iti maysa a nalawag a karton tapno mapagtalinaed ti langa daytoy.
Nasarakan ken innannadan ti naidumduma a sitsirya ti sports memorabilia company a 1st & Goal Collectibles iti nagbaetan ti 2018 ken 2022.
Nupay kasta, nagbalin a viral daytoy iti online idi 2024, isu nga ad-adda pay a dimmakkel ti interes dagiti kolektor.
Daytoy ti kanginaan a pedaso ti sitsirya iti pakasaritaan ti lubong.
