LAOAG CITY – Naarestar dagiti siyam a tattao gapu iti maipagarop a panagsusugal da iti kubu-kubo nga adda iti tengnga ti taltalon iti paset ti Barangay 22 iti ili ti San Nicolas.
Kinumpirmaran ni Barangay Chairman Boyet Agustin iti Barangay 10, San Nicolas, Ilocos Norte a dagiti dadduma a natiliw ket kabarangayan na.
Binigbig na dagitoy nga isuda Mark Louie dela Cruz, Henson Valdez, Nick Anthony Vidad, Melvin dela Cruz, ken ni Aurelio Guira, agpapada a residente iti Barangay 10 iti nasao nga ili.
Kabayatanna, dagiti kakadwa da a nagsusugal ket Mark dela Cruz, , Glenn Dela Cruz, Allen Borje, Aldrich Borje, agpapada a residente iti Barangay 11 iti nasao nga ili.
Nakumpiskar iti ikot dagiti suspek ti maysa a set ti baraha, P670 a pisos, lamisaan, cellphone a kukua ni Henson Valdez, Cellphone nga addaan ti powerbank a kukua met ni Mark Louie dela Cruz ken ti maysa a landok.
Naala pay dagiti personal a kwarta dagiti suspek nga umab-abot ti P3,740.
Maisagsaganan ti maipila a reklamo kontra kadagiti nasao a suspek.
