LAOAG CITY – Natiliw iti SK Chairman iti Brgy. 22 ditoy siudad ti Laoag kalpasan a nagprob-probokar iti maysa a panganan iti Brgy. 14 ditoy siudad.
Binigbig ni Police Lt. Col. Joseph Baltazar, ti chief of police ditoy siudad ti Laoag ti suspek a ni Tristan Jade Felipe y Cu, agtawen ti 27, SK chairman iti Brgy. 22 ditoy siudad.
Iti Press Conference iti Philippine National Police ditoy siudad ti Laoag, inlawlawag ni Baltazar nga immuna nga adda ti nagreport iti opisina da nga agprob-probokar ti nasao nga opisyal ti barangay iti Bossing Carinderia iti Brgy. 14 ditoy siudad no sadinno a maipagarop a dinangran na pay ti barangay kagawad a mangan-anawa kenkuana.
Dagus a nagresponde dagiti otoridad iti lugar no sadinno a nadanun da ti nabartek a suspek nga agwalwala kagiddan iti panagisawang na kadagiti agkakadakes a sarita kadagiti indibidwal nga adda iti nasao a panganan.
Inpalgak ti hepe ti pulisya nga imbes nga agsardeng ti SK chairman idi adda ti presensya ti nailian a pulisya iti lugar ket isuda metten ti maipagarop nga insaruno na a dinarop no sadinno a sumagmamano kadagiti police officers ti nakugtaran.
Inlawlawag ni Baltazar a saan a daytoy iti umuna a gundaway a nairaman ti suspek ti insidente wenno gulo gapu ta idi 2018 ket karaman iti napasamak a maysa a rambol a nakabagkungan na ngem saan a nabigbig ti nakabagkong kenkuana isut gapuna nga awan ti naipila a kaso.
Kuna pay ni Baltazar a saan na mababalaw no adda ti makaaramid ti saan a napintas tii SK Chairman gapu ta madlaw a madi ti ugalina.
Masdaaw pay ti chief of police no apay a binotosan dagiti kabarangayan na ti kas kenkuana.
Kabayatanna, maisagsaganan dagiti kasapulan a dokumento para iti pannakaipila ti reklamo a direct assault, disobedience to a person with authority ken plano da pay a pilaan ti suspek ti administrative case ken grave misconduct.
Mainaig iti daytoy, inpalgak ni Police major Jephre Taccad, ti panakangiwat ti Ilocos Norte Police Provincial Office a sinukatan da ti mugshot ti suspek gapo ta naka-middle finger daytoy a mangipaneknek iti kinaalas ti ugali ti nasao nga SK Chairman.
Ginandat ti newsteam ti Bombo Radyo Laoag nga alaen ti kabibiangan ti suspek nga adda iti kustodyar ti Philippine National Police ditoy siudad ti Laoag ngem nagkedked a nagsarita.
