LAOAG CITY – Nagballaag ti Department of Science and Technology (DOST) a mabalin a makapadakes iti salun-at ti sobra a pannangan uray dagiti maibilang nga “healthy foods.”
Segun ken ni Shannen Faye Arevalo, science research specialist ti Department of Science and Technology -Food and Nutrition Research Institute (FNRI), saanna a kayat a sawen a natalged ti pannangan iti sobra a taraon uray dagitoy a produkto ket addaan ti label nga “healthy” wenno “low-fat.”
Inpetteng ni Arevalo ti prinsipyo a “mo-va-ba” wenno moderation, variety ken balance kas tulbek iti usto a pannangan.
Inlawlawag na nga uray makuna nga healthy ti makan, ti sobra a panagkonsumo kadagitoy ket makapadakes iti puso ken iti pakabuklan ti salun-at.
Innayon na a napateg ti “portion control” tapno masigurado nga umdas laeng ti nutrisyon a maal-ala ti bagi ken saan a masobraan.
Dinakamat na ti sumagmamano a produkto a “low-fat” kas ti canned fruits, gatas ken condiments ket mabalin nga adda ti nayun nga asukar wenno asin tapno mapagtalinaed ti raman na idinto a dagiti dadduma ket nakurang ti fiber, bitamina ken mineral.
Kuna na pay a dagiti pannangan kadagiti addaan ti “good fats” kas ti mani, olive oil, avocado ken salmon ket nangato latta ti calories na a mabalin a mangnayun ti timbang a kangrunaan a risk factor ti sakit iti puso ken stroke.
