LAOAG CITY – Kwinestionaran ti Sangguniang Panlungsod ditoy siudad ti Laoag ti 40 a milyon a pisos a nailatang para iti Slaughter House iti Brgy. 1 San Lorenzo ditoy siudad.
Segun ken Konsehal Jason Perera, dinakamat ti National Meat Inspection a saanen a mabalin a ti Slaughter House ket agian iti Brgy. 1 San Lorenzo.
Gapu iti daytoy, inbatadna a gimmatang ti lokal a gobierno ti lote iti Brgy. Camangaan ditoy siudad ti Laoag a pakaikabilan ti Slaughter House.
Nupay kasta, apaman a naipasdek daytoyen ket naibaga kadakuada a saan manen a mabalin iti nakaipatakderan ti Slaughter House gapu ta asideg kadagiti pagtaengan dagiti residente isu a naipasubli iti Brgy. 1 San Lorenzo.
Inlawlawagna a saan nga agsusurot dagiti ibagbaga ti ahensia ti gobierno isu a masapol a matingiting a naimbag ti pannakailatang ti nasao a pundo gapu ta masayang laeng daytoy no awan manen ti pakaibanaganna.
Mainaig iti daytoy, inpalgak ni Konsehal Perera a masapol nga adalen a nasayaat ti mailunglungalong a gakat tapno maliklikan dagiti saan a napintas a resulta ti proyekto ti gobierno.
Kunana a siguradoen nga umuna nga iti rural areas ti pakaipasdekan ti Slaughter House ken adayo kadagiti pagtaengan dagiti residente tapno awan ti maperwisio.
Kabayatanna, naammoan nga adda ti economic viability a mabalin a mausar tapno ad-adda a mabenepisiaran ti lokal a gobierno.
