LAOAG CITY – Dinayaw ni Speaker Ferdinand Martin Romualdez ti Gilas Pilipinas iti iskor nga 89-80 a panangabak daytoy kontra iti Latvia a maikanem iti world basketball ranking iti naiyuswat a 2024 FIBA Olympic Qualifying Tournament.
Inbatad ni Speaker Romualdez nga inpakita ti Gilas Pilipinas ti naisangsangayan a panagballigi no sadino ket naital-o iti intero a pagilian.
Indauluan ni coach Tim Cone ti Gilas Pilipinas iti laban a naisayangkat iti Arena Riga.
Kuna ti Speaker, saan laeng a simple a panangabak daytoy iti scoreboard no di ket balligi iti tunggal puso dagiti atleta nga ibagian ti Pilipinas iti intero a lubong.
Nagserbi daytoy nga inspirasion kadagiti naruay a Pilipino nga agpursige gapu ta naidumduma ti talento dagiti Pilipino iti tay-ak ti sports.
Inlawlawag ni Speaker Romualdez nga inpakita ti Gilas ti kinasirib ti tunggal umaayam iti babaen ti panangidaulo ni Coach Tim Cone.
Inpasingked ni Speaker Romualdez ti panagsuportana saan laeng iti Gilas Pilipinas no di ket para kadagiti umaayam nga iriprisentar ti Pilipinas iti international events.
