LAOAG CITY – Nabayagen nga expired ti special permit dagiti tallo nga operators ti modernized jeep nga addaan ti ruta a Laoag-Pasuquin.
Daytoy ti inpakaammo ni Mr. Mark Antony Gaviola, traditional jeepney driver nga isu ti mangirekreklamo kadagiti nasao a maseknan.
Segun kenkuana, pudno nga adda ti special permit dagiti tallo nga operators ti modernized jeep ngem nabayagen nga expired dagitoy.
Inbatadna a nakailanad iti nadakamat a permit a naiyisyu daytoy idi Septiembre 7, 2021 ken nagngudo daytoy idi Abril 1, 2022.
Kunana nga agtultuloy latta nga agiluglugan dagiti maseknan a modernized jeepney operators iti paset ti Sitio Nagabungan, Brgy. Davila iti ili ti Pasuquin no sadino isuna mismo ti nakakita iti maysa kadagitoy nga addan iti plate number a 2039.
Inlawlawagna a no adda iti baro a permit-da ket nasken nga idatagda daytoy tapno mangipaneknek a legal dagitoy nga agiluglugan kadagiti pasahero.
Mainaig iti daytoy, kiniddaw ni Gaviola ti tulong tapno maiplastar iti panagpasada dagiti modernized jeep.
Kabayatanna, inpakaammo ti dispatcher iti modernized jeep iti ruta Laoag-Bacarra ken Pasuquin nga adda iti updated nga special permit-da ngem saanda a maipakita gapu ta ti nakaiggem ket dagiti opisial iti Laoag-Bacarra-Pasuquin Transport Group Incorporated.
