LAOAG CITY – Kalikagum ni Sangguniang Panlungsod Member Bryan Alcid nga ilungalong ti pannakaadaptar kadagiti sumagmamano a traffic scheme ken pannakaipatakder ti pasdek idiay Hawaii ditoy siudad ti Laoag.
Segun kenkuana, daytoy ket kalpasan a nakitana dagiti sumagmamano a linteg kabayatan ti panagbisitada idiay isla ti Hawaii kaduana dagiti dadduma pay a padana a Konsehal pakairamanan ni Mayor Michael Marcos Keon.
Inbatadna kas Chairman ti Committee on Transportation ket naobserbaranna a naakikid ti kalsada idiay Hawaii idinto a nupay nalawa ti dalan ditoy pagilian ngem nairut latta ti taray ti trapiko.
Kunana a maminsannanto nga adalen ti Traffic Code no kasano a maiyaplikar ti nasao a banag ditoy siudad ti Laoag.
Mainaig iti daytoy, inpakaammona nga iti biang ti Committee on Infrastructure ket limitado ti kangato ti pannakaipatakder dagiti pasdek ken pagtaengan idiay Hawaii.
Innayonna a tingitingennanto pay ti agdama a maipatpatungpal a Building Code nangruna ket idi pay laeng 2018 idi naudi a naamendaran daytoy a linteg.
