LAOAG CITY – Addan ti 90 a porsiento a nakasaganan dagiti sports venues para iti mapaspasangasangan a Region 1 Athletic Association.
Daytoy ti inpakaammo ni Mrs. Helen Rose Domingo, ti mangidadaulo iti Provincial Sports and Development Office.
Segun kenkuana, iti agdama ket adda laengen dagiti sumagmamano a maiplasplastar pakairamanan ti dog out iti Ilocos Norte Centennial Arena ken ti baseball field iti Bacarra National Comprehensive High School.
Inbatadna a maileppas dagitoy sakbay pay a sumangpet dagiti makipaset iti nasao nga aktibidad.
Mainaig iti daytoy, inpasingkedna nga addan ti 100 a porsiento a nakasagana dagiti pagadalan a temporario a pagtarusan dagiti makipartisipar pakairamanan dagiti makeshift bathrooms ken shower rooms.
Inlawlawagna a dagitoy a venues ket binisitan ni Gov. Matthew Marcos Manotoc ket awan met dagiti nakitana nga aniaman a problema.
Kunana nga inton Abril 5 ket isu ti naituding a pannakaiyuswat ti panagtataripnong iti Department of Education kasta met iti Regional Committee ti Region 1 Athletic Association tapno pagnunumoan dagiti dadduma pay a detalye iti nasao nga aktibidad.
Kabayatanna, naammoan a ti Region 1 Athletic Association ket maisayangkat inton Abril 22 agingga 27 no sadino adda ti 14 nga Schools Division ti makipaset ken adda ti 18 a ribu ti makipartisipar a bukbuklen dagiti players, coaches, technical officials ken dadduma pay.
