LAOAG CITY – Naiyuswat ti State of the Municipality Address ni Mayor Joseph de Lara iti Federico F. de Lara Civic Center.
Babaen iti daytoy, inbinsabinsana dagiti naggapoan ti lokal a gobierno babaen iti panangidaulona iti nasao nga ili.
Segun kenni Mayor de Lara, adda dagiti naipasa nga ordinansa a nangiyetnag ti simple ken alisto a pannakaipadanon ti tulong iti lugarda kas ti pannakaipaay ti benepisyo kadagiti senior citizens apaman a madanonda ti tawen a 80 wenno 90 nga inisponsoran ni Sangguniang Bayan Member Ninoy Aquino.
Naragsak nga inpakaammona a nairehistro ti ilida iti National Historic Commission pakaseknan iti baro a seal-da nga adda ti surat manipod iti opisina ti Presidente a nangipakaammo kadakuada ti pannakaaprobar ti municipal seal.
Inpannakkelna nga inikkan ti National Privacy Commission ti lokal a gobierno iti ili ti Solsona ti Certificate of Registration kas pammaneknek a naigetda a sumursurot kadagiti pagalagadan seknan iti Data Privacy.
Inbatadna a naiget a naipatungpal ti pannakaipakat ti ordinansa mainaig iti pannakaipawil ti nakaussob a magmagna wenno agiturturong ti lugan kadagiti pampubliko a lugar iti ilida nga inisponsoran ni Sangguniang Bayan Member Lordines dela Cruz.
Kunana a nakipaset ti lokal a gobierno iti “Buhay ay Ingatan, Droga ay Ayawan” wenno BIDA Program ti Philippne National Police no sadino adda ti maiyus-uswat a zumba tunggal malem ti Biernes para kadagiti agpapaay nga empleado tapno matagiben ti physical fitness dagitoy pakairamanan dagiti dadduma pay nga sports activities a mangiliklik kadagiti umili kadagiti maipawil nga aktibidad ken droga nga inlungalong ni Sangguniang Bayan Member Marvin Pascua.
Innayonna a naselebraran pay ti Womens’ Month ken Pride Month iti ilida a mangipakita ti patas a pannakaipaay ti karebbengan dagiti kailianda.
