LAOAG CITY – Kinumpirmaran ni Police Lt. Col. Rafael Lero, hepe ti PNP Laoag nga adda dagiti sumagmamano kaso a nakairamanan ni Junvert Padaca y Palting, agtawen ti 33, ti subject ti search operation iti Brgy. 27 ditoy siudad ti Laoag.
Kuna na a nakasuan ti theft, estafa, ken cattle rustling idi tawen 2014 ditoy siudad ti Laoag ken maipagarup nga adda pay ti kaso na iti carnapping iti sabali nga ili.
Segun kenni Lero, ni Padaca ti maysa a nabigbig gapu ti maipagarup a panagtakaw na ti kalding iti sabali nga ili iti kallabes.
Inbunannag na a nupay saan a drug surenderee ni Padaca ket adda ti nagan na iti D.I watchlist kas drug personality.
Kabayatanna, kalpasan a nakarekobre dagiti otoridad ti maysa a granada, maysa nga homemade caliber 22, maysa a riffle grenade ken 20mm a bala, adda ti alegasyon ni Padaca ken ti pamilya na a naimula dagiti ebidensya.
Daytoy ket gapu ta adda ti simrek iti pagtaengan da a sumagmamano a lallaki nga isut ti atapen da a nagipan kadagiti narekobre a banag.
Kuna ni Lero a maibilang laeng nga alegasyon dagiti maseknan gapu ta naimatangan met ti opisyal ti barangay, media, ken dadduma pay nga otoridad a naiwayat ti panagkapkap sakbay ti panagsukisok dagiti otoridad.
Inpetteng na a saan a mabalin a dagus a sumrek dagiti otoridad iti pagtaengan a saan nga isu ti prosesso.
Innayon ni Lero a karbengan dagiti maseknan ti agreklamo kontra ti naiyuswat nga operasyon.
Maisagsaganan ti maipila a reklamo kontra kenni Padaca iti iligal a panagikot ti eksplosibo ken iligal a panagikot ti paltog ken bala.
