LAOAG CITY – Umad-ado dagiti agkalikagom a makaammo maipanggep iti “hormonal belly,” ti termino a masansan nga us-usaren tapno iladawan ti panagdakkel ti buksi a maikonkonektar iti saan a balanse nga hormones iti bagi.
Saan pay a maibilang nga official diagnosis ti hormonal belly, ngem mabalin daytoy a maikonektar kadagiti kondisyon a makaapektar iti hormones kas ti stress, menopause, ken problema iti thyroid.
No adda ti imbalanced hormones, mabalin a maapektaran ti metabolism ken ti panagurnung ti taba, aglalo iti paset ti buksit.
Maysa kadagiti kangrunaan a rason ket ti nangato a lebel ti cortisol wenno “stress hormone.”
Naamoan a no kanayun nga stressed ti maysa a tao, mabalin nga agtungpal daytoy iti panagnayun ti taba iti abdomen.
Para kadagiti babbai, ti panagbaba ti estrogen iti panawen ti panag-menopause ket mabalin a mangitunda ti pannakaiyakar ti taba agturong iti buksit.
Malaksid iti daytoy, ti kinakurang ti turog, saan a balase a diyeta ken kaawan ti ehersisyo ket mabalin a mangpakaro ti panagdakkel ti buksit.
Inbalakad dagiti doktor a saan a dagus a mangnamnama kadagiti “quick fix” wenno supplement a mangikarkari a matunaw ti taba iti buksit, imbes ket tutukan ti nasalun-at a panagbiag, karama ti umiso a nutrisyon, regular a panag-ehersisyo, umdas a turog ken panangiwanwn ti stress.
