LAOAG CITY – Doble ti nagngatuan tiinaldaw a subsistence allowance dagiti kameng ti Armed Forces of the Philippines (AFP) babaen iti 2025 national budget.
Daytoy ti inwaragawag ni House Speaker Martin Romualdez idi simmarungkar kadagiti soldado iti Naval Operating Base idiay Subic, Zambales idi laeng kalman.
Iti panagbitla ni Speaker Romualdez, inpagunamgunam na kadagiti soldado a nangilatang ti House of Representatives iti P15 billion package a nasurok a doble ti P150 subsistence allowance-da iti P350.00.
Inyunay-unay ni Romualdez a mangingato ti subsistence allowance dagiti soldado nangruna ta saan a mabalin a diskuento ti serbisioda iti umili.
Segun iti Speaker, ti nasao nga addang a mangpangatu iti subsistence allowance dagiti soldado ket natibker a panagkumit ti Kamara a mangipasigurado ken mangsalaknib iti pagsayaatan dagiti soldado.
Innayon ti lider ti Kamara nga obligasion ti gobierno a siguraduen nga umdas ti kabaelan ti militar a mangidepensa iti pagilian.
Kabayatanna, gagem ti ganuat ti panangipaay iti umdas a pondo a tumulong iti modernisasion a programada ken mangipatungpal iti mandatoda a mangsalaknib iti kinasoberano ken mangidepensa iti teritorio ti pagilian, rason no apay a nagyaman ti Speaker kadagiti personnel ti Philippine Navy ta “vanguards” ti Philippine Maritime Security.
