LAOAG CITY – Inpakaammo ni Bombo International News Correspondent Rene Ballenas manipud idiay New Jersey, United States of America nga adda dagiti sumagmamano a botante idiay Estados Unidos ti mabutbuteng no bilang maulit ti napasamak nga US Capitol riot kalpasan a saan a maakseptar ni dati nga United States Pres. Donald Trump ti pannakaabakna idi Enero 6, 2020.
Segun kenkuana, madanagan dagiti botante no bilang saan a maawat ni Trump ti agbalin a resulta ti 2024 US Presidential Election nangruna ket rumrummuar nga adda dagiti maipagarup a panagswitik iti eleksion.
Inbatadna a basar iti survey ti Iowa ket bimmaba ti puntos ni Trump no sadinno nga addaan daytoy ti 44 a porsiento idinto nga 47 a porsiento met ken ni US Vice Pres. Kamala Harris.
Kunana nga alisto ti panagbilang dagiti butos idiay Amerika babaen iti pannakaipadalan dagitoy iti machine.
Innayonna a kabayatan nga umas-asideg ti eleksion ket bumarbara ti nagbaetan da Trump ken Harris no sadinno nga adda pay ti panag-overtime dagitoy iti panagkampania.
Kabayatanna, inpakaammo ni Bombo International News Correspondent Isidro Madamba manipud idiay California, United States of America a dikit wenno arig agpada a patas ti butos dagiti dua a kandidato no sadinno nga ikarkarigatanda nga allukoyen dagiti botante.
Kunana nga adda ti ballaag ti Federal Bureau of Investigation maipanggep iti pangta ti eleksion no sadinno nga adda dagiti bidyu a rumrummuar iti online.
Inlawlawagna a ti atapen ti Federal Bureau of Investigation nga akin-aramid iti daytoy ket dagiti tallo a pagilian pakairamanan ti China, Iran ken Russia.
