LAOAG CITY – Inbatad ni Mr. Danilo Salva iti Barangay Sto. Niño iti ili ti Nueva Era a sumagmamano nga aldaw wenno idi Oktubre 13 sakbay a maipagarop a nakidnap ti kabsat na a ni Joel Salva ket adda ti nagturong a kameng ti PNP iti family house da.
Maysa kadagiti dinakamat ni Danilo a rumrumuar a napan iti family house da ket ti pulis a ni “Sir Pola”.
Segun kenni Danilo, inbaga kenkuana ti uliteg na a ni Joey a ti birbiruken dagiti otoridad ket ni Joel ngem iti dayta a gundaway ket awan ti maseknan iti nasao a lugar.
Inlalawag na a basar iti palawag ti uliteg na a ni Joey, ginammatan isuna dagiti pulis ngem saan da a naitugot gapo ta inbaga na a saan nga isuna ni Joel.
Kunana nga idi Oktubre 19, nagatendar iti assembly meeting ni Joel ken kalpasan daytoy ket napan nagideliver ti itlog ngem bayat nga adda iti Barangay Liliputen iti ili ti Pinili ket naperdian iti lugan.
Gapo iti daytoy, timmawag ni Joel iti mekaniko tapno agpatulong ngem bayat ti panagsarsarita da ket nangeg ti mekaniko nga isawsawang ni Joel ti “apay sir, awan basol ko”.
Kalpasan daytoy, inpakammo ti mekaniko kenni Danilo ti nangeg na nga inbagbaga ni Joel a rason met ti dagus da a panagturong iti nasao a lugar.
Inpalgak ni Danilo a naibaga kadakuada dagiti babbarito iti nasao a lugar a ti innova a puraw ket nagbwelta iti sangwanan da ken maipagarop a naguyguyod a nailugan ni Joel iti nasao a behikulo.
Mainaig iti daytoy, kuna ni Danilo a basar iti CCTV iti talyer ket napaspasa a nagpadaya ti Innova idinto a ti Crosswind nga agmaris ti orange ket nagna iti parte ti Bumitog.
Dinakamat na a napan da iti PNP ken naamoan da nga awan ni Joel iti nasao nga istasyon ti pulisya.
