LAOAG CITY – Inbatad ni Brgy. Chairman Melvin Santos iti Brgy. 1 San Lorenzo ditoy siudad ti Laoag a nagngudon ti enhanced community quarantine iti nasao a barangay.
Nu pay kasta, kuna na a gapu iti nagpositibo manen a kabarangayanna a ni IN-C656, maysa a partidor, masapol nga agtalinaed ti lockdown kadagiti dadduma a pagtaengan.
Segun ken ni Santos, mabalinen a rumuar dagiti kabarangayanna, malaksid laeng kadagiti agarup 30 a pagtaengan nga adda iti bisinidad ti Doña L.V. Cid Street manipod iti J.P. Rizal Street agingga iti D. Samonte Street ken iti paset ti Doña M.G. Castro Street manipod Primo Lazaro Street agingga iti D. Samonte Street.
Innayun na a daytoy ket maibasar iti direktiba ni Mayor Michael Keon ditoy siudad.
Immunan nga inpakaamo ni Santos a negatibo ti immuna a swab test result ni IN-C656.
Nu pay kasta, kuna na nga apaman a dimmalan manen iti swab test para iti panagsubli na iti slaughter house ket dita a nagpositibo daytoy.
