LAOAG CITY – Inbatad ni Bombo International News Correspondent Divina Grace Valera nga idi Domingo, aldaw idiay Estados Unidos ket adda ti ballaag kadakuada nga adda ti mapasamak nga winter storm.
Segun kenni Valera, ti winter storm ket apektaran na ti northeast ti pagilyan wenno ti New York agingga iti estado ti Virginia.
Inlawlawag na a nabalakadan da a saan a rumwar gapo ta delikado no sadinno a nagalis ti dalan.
Kunana pay a gapo iti paspasaren da ket adda dagigi opisina ken pagadalan kadagiti lugar nga apektado a saan a naglukat.
Dinakamat na pay nga idi adda ti forecast ti winter snow iti nasao a pagilyan ket dagus met a napan naggatang dagiti residente ti suplay da kas iti groceries ken dadduma pay a kasapulan agingga a saan da a mabalin a rumwar.
Innayon na a masapol ti naiget a panagannad nangruna ket mabalin a makaitunda daytoy ti sakit kas iti panateng wenno uyek.
