LAOAG CITY – Naiyuswat ti public hearing a nakaidasaran ti nagduduma a problema iti merkado publiko ditoy ciudad ti Laoag nga inatendaran da Mayor Michael Marcos-Keon, Vice Mayor Carlos Fariñas, Konsehal Jason Perera ken sumagmamano nga empleado iti gobierno lokal ditoy ciudad .
Karaman kadagiti naidasar kabayatan ti public hearing ket ti pakaseknan ti presyo ti karne ti baboy no sadinno a kalikagom ti konseho a maipababa iti 310 a pisos manipod iti 320 a pisos.
Nupay kasta, saan nga immanamong dagiti aglaklako ti karne ti baboy gapu ta inpetteng da a nangato unay ti baybayadan da a buwis iti gobierno lokal ditoy ciudad.
Malaksid iti daytoy, kalikagom pay ti kaadoan nga aglaklako iti tiendaan a masukatan ni Miss Blenda Almo, ti mangidadaulo iti merkado publiko ditoy ciudad gapu ta maipagarop a saan da a kayat ti serbisyo na.
Ipetpetteng dagiti aglaklako iti tiendaan a maipagarop a saan a mapan agmonmonitor ni Almo rason a saanna nga ammo nga adda dagiti negosyante nga agab-abuso babaen ti panagnaynayun da ti ilako da malaksid kadagiti produkto a naiparehistro da.
Irekreklamo pay dagiti aglaklako iti tiendaan ti maipagarop a basta lattan panangipaserra ni Almo ti maysa kadagiti Comfort Room ti babbai iti tiendaan.
Mainaig iti daytoy, inbatad ni Almo nga iti baet dagiti reklamo kontra kenkuana ket agbalin latta a patas ken aramiden na ti trabaho na.
Immunan nga inpanamnama ni Mayor Keon a masolbar amin dagiti naidasar a reklamo dagiti aglaklako iti merkado publiko ditoy ciudad ti Laoag iti kabiitan a panawen.
