LAOAG CITY – Sumagmamano a tattao ti natay ken umabot iti 19 a tattao ti mapukpukaw kalpasan ti panagbettak iti military explosive facility idiay Tennessee.
Segun kenni Humphreys County Sheriff Chris Davis, malidayan unay ken awan ti short-term explanation mainaig pasamak.
Kunana pay nga adda ti sumagmamano kadagiti biktima ti naitaray iti ospital kalpasan ti insidente.
Napasamak ti insidente iti Accurate Energetic Systems factory a masarakan iti McEwan City iti Humphreys County, Tennessee.
Ti paktorya ket kukua ti Accurate Energetic Systems nga akin-trabaho iti development, manufacture, ken storage kadagiti eksplosibo.
Agtultuloy pay laeng ti imbestigasyon dagiti otoridad mainaig iti insidente.
Kabayatanna, inbatad ti maysa a ballisitic expert a ni Dr Chris Shepherd iti University of Kent, no adda ti kastoy a pasamak ket gapo iti raw materials.
Inlawlawag na a ti raw materials ket dagitoy ti delikado ken saan na nga inpagarop nga adda ti kastoy nangruna ket istrikto itan dagiti standards iti modern manufacturing.
Kunana a no ti eksplosibo ket naaramiden para iti final product, maibilang daytayen nga stable ken natalged ken mabalin a maidulin iti sumagmamano a tawen wenno dekada. Maipalagip nga idi 2014 ket adda manen ti panagbettak iti nasao met laeng a lugar a nakatayan ti maysa nga indibidual ken tallo ti nasugatan.
