LAOAG CITY – Maobserbaran dagiti sumagmamano a traditional jeepney drivers nga ad-adu dagiti aglugan a pasahero kadagiti modern jeepney gapu iti nabara a panawen.
Gapu iti daytoy, inadmitir ni Mr. Fedwin Ces Rabago, Jeepney Driver ti ruta a Laoag-Gabu a dakkel ti epektona kadakuada nangruna ti birokda iti inaldaw-aldaw a panagpasada dagitoy.
Inbatadna nga apaman a pormal a naideklarar ti panawen ti kalgaw iti kallabes ket bimmasiten dagiti pasahero nga agluglugan kadakuada gapu ta ad-adda met a pilienda dagiti modern jeepney nga air-conditioned banag nga isu ti birbiruken ita dagiti pasahero.
Inlawlawagna nga iti dati ket makapaspastrekda ti 300 a pisos iti kada aldaw ngem ita ket 250 a pisos laengen iti kada aldaw.
Innayonna nga iti baet a napudot ti paniempo ket saan met a mabalin a kissayanda ti seating capacity iti luganda gapu ta malugi dagitoy nangruna ket nangina ti gasolina.
