LAOAG CITY – Nangipila ti supplemental petition iti Korte Suprema dagiti sumagmamano a transport group iti pagilian tapno kiddawen ti pannakaiparuk-at ti Temporary Restraining Order kontra iti Public Utility Vehicle Modernization Program nga ilunglungalong ti gobierno.
Daytoy ti nagbalin nga addang dagiti sumagmamano a transport group maysa nga aldaw sakbay ti naituding a deadline para iti public utility vehicle consolidation.
Nakaipalaon ti nasao a petision ti maipagarup a napagtitipon a Technical Requirement ti baro a Department Order ti Department of Transportation a mangmanmandar met iti Land Transportation Franchising and Regulatory Board nga adaptaren dagiti pagannurutan iti consolidation ken substitution dagiti unit banag a saan a nakailanad iti daan a Department Order ti nasao nga ahensia.
Kabayatanna, karaman kadagiti petitioners ket dagiti grupo ti Pagkakaisa ng mga Samahan ng Tsuper at Operator Nationwide, Para-Advocates For Inclusive Transport, No to Public Utility Vehicle Phaseout Coalition of Panay, Komyut ken ti Multi-sectoral group Bayan Muna Party-list.
Maipalagip nga inbatad ti Korte Suprema nga agdama pay laeng nga adda iti babaen ti deliberasion ti naipila a petision ti grupo a Pagkakaisa ng mga Samahan ng Tsuper at Operator Nationwide maipapan pay laeng iti nasao a banag.
Immuna iti daytoy, inrakurak mismo ni Presidente Ferdinand Marcos Jr. a saanen a maiyalud-od pay ti naituding a deadline para iti consolidation dagiti pampubliko a lugan ditoy pagilian.
