LAOAG CITY – Saan nga umanamong dagiti tricycle drivers ditoy siudad ti Laoag mainaig iti plano ti City Government a pannakabalbaliw ti disenyo ti sidecar dagiti tricycle ditoy siudad.
Inpettengda a no maipatungpal daytoy a banag ket kasapulan met iti kuarta tapno naan-anay a maaramid daytoy dagiti tricycle driver no sadino nga inbatad dagitoy a saanda kabaelan gapu ta bassit ti masapsapolanda iti inaldaw.
Kunada, no laketdi ited ti City Government iti usarenda ket umanamongda.
Kabayatanna, kuna met dagiti dadduma a napinpintas no pagtalinaedenda ti agdama a disenyo iti sidecar ti tricycle ditoy siudad gapu ta isu iti nakadawyanda ken nalaglag-an nga ibyahe.
Mamatida nga iti disenyo ti sidecar ditoy siudad ket moderno a maibagay iti moderno a panagbiyag ditoy siudad ti Laoag.
Innayon pay dagiti dadduma a maseknan a tricycle drivers a saa da koma nga ipadpada iti sabali a lugar ti siudad gapu ta ananoen ti nalawa a sidecar no bassit met laeng ti pasaheroda iti inaldaw nga aglugan kadakuada ken inbatadda nga ania ti serserbi ti panangpalawa iti sidecar no dua met laeng nga indibidual ti mabalin nga ilugan iti maysa a tricycle.
Inlawlawagda nga imbag iti sabali a lugar kas iti Vigan City ket mausarda iti kinalawa ti sidecar gapu ta adu iti mabalin nga iluganda.
Adda dagiti dadduma pay nga nangibaga a saan koma nga ipada ti City Government iti disenyo ti tricycle iti sabali a lugar gapu ta mamatida nga iti siudad laeng ti addaan ti kastoy a disenyo.
Kabayatanna, kunada a napinpintas a pagtalinaeden tapno adda met ti pakailasinan a daytoy ket tricycle iti siudad ti Laoag gapu ta adda ti naidumduma a disenyona ken awan iti kapadana
