LAOAG CITY – Inkonsiderar ti sumagmamano nga agpanpanday linteg a “big deal” at “small win” ti desisyon ti Korte Suprema a saan a mangisyu ti Temporary Restraining Order (TRO) kontra iti impeachment proceedings ken ni VP Sara Duterte.
Basar kadagiti miyembro ti kamara de representantes, karaman ni ML party-list Rep. Leila de Lima, agtultuloy ti proseso gapu ta awan ti pammilin a manglapped iti panagdengngeg intono Abril 14 ita a tawen.
Mangnamnama daytoy a mangipakita ti “judicial restraint” ti Korte Suprema ken baybay-an ti impeachment process nga aggunay.
Inbatad met ni Akbayan party-list Rep. Perci Cendaña a positibo a development ti saan a panangiparuk-at ti TRO gapu ta maikkan ti gundaway a masungbatan dagiti alegasyon kontra iti bise presidente.
Innayon ni De Lima a possible a maipagarop a nairanta dagiti petisyon kas “distraction” manipod iti impeachment proceedings.
Segun kadagiti sumagmamano nga agpanpanday linteg, karaman da Cendaña ken Gabriela party-list Rep. Sarah Elago, masapol a maiprayoridad iti panagdengngeg dagiti testigo mainaig iti maipagarop a confidential funds issue ti Bise Presidente.
Para met ken ni House justice panel member Rep. Joel Chua, ti impeachment ket saan a distraksyon no di ket panagsagsagana iti umiso a panagpili ti lider intono 2028.
