LAOAG CITY – Nangiwayat ti Russia ti nalawa a nuclear exercises no sadinno a nagpatayab daytoy ti nuclear-capable missiles ken nangiparuk-at ti nuclear munitions iti sumagmamano a military units iti baet ti kumarkaro a tension iti North Atlantic Treaty Organization mainaig iti gubat iti Ukraine.
Basar iti report, sumurok-kumurang 64 a ribu a kameng ti nakipaset iti maysa kadagiti kadakkelan a nuclear drills ti Russia kadagiti naglabas a tawen.
Gagem daytoy a siguradoen ti kinasagana ti nuclear forces-da no bilang maaddaan ti panangatake kontra iti pagilian.
Inbatad ni Russian President Vladimir Putin a ti panagusar ti nuclear weapons ket agtaltalinaed a maudi nga opsyon ti pagilianda ngem inpettengna a masapul nga agtalinaed a natibker ti nuclear capability ti Russia ken Belarus gapu iti dumakdakkel a pangta.
Nangiwayat met ti Russia ti nagduduma a missile pakairamanan ti Yars intercontinental ballistic missile, Zircon hypersonic missile ken Sineva ballistic missile.
Inpakita ti militar ti sumagmamano a nuclear submarines ken hypersonic missile systems-da.
Kagiddan daytoy, naminsan manen a nagbinnara iti rakurak ti Russia ken sumagmamano a pagilian a kaalyado ti North Atlantic Treaty Organization iti Baltic region.
Inakusaran ti Moscow dagiti pagilian ti Baltic a maipagarup a mangipalpalubos iti panagusar ti airspace-da para iti drone attacks kontra iti Russia banag a naglikudan met ti North Atlantic Treaty Organization.
