LAOAG CITY – Mamati ni House Speaker Faustino “Bojie” Dy III a nasken nga agserbi nga inspirasion ti 2026 Palarong Pambansa tapno magutigot ti ad-adu nga agtutubo a Pilipino a tungpalen dagiti arapaapda.
Iti mensahena para iti naindaklan nga aktibidad a maisayangkat mangrugi ita nga aldaw, Mayo 24 agingga 31 idiay Prosperidad, Agusan del Sur.
Inbatad ni Dy a napateg ti sports iti panangasa ti disiplina, kinatibker ken leadership ti agtutubo.
Inpettengna a ti Palarong Pambansa ket saan laeng a kompetision para iti medalya no diket panangselebrar ti kinagaget, sakripisio, teamwork ken anus dagiti atleta nga estudiante manipud kadagiti nagduduma a paset ti pagilian.
Kunana a nangabak aminen a nakipaset gapu iti dedikasion ken panangikagumaan nga inpakitada tapno makadanon iti nailian nga ay-ayam.
Ginutigotna pay dagiti atleta a lumaban nga addaan ti integridad kabayatan ti panangiprisentar ti pagadalan, komunidad ken rehion dagitoy.
