LAOAG CITY – Napilitan nga ipasardeng ti sumagmamano nga ili ditoy Ilocos Norte ti town fiesta dagitoy gapu iti kumarkaro a krisis iti ekonomia ditoy pagilian.
Segun ken ni Mr. Aianree Raquel, mangidadaulo ti Ilocos Norte Tourism Office, nangiparuk-at ti advisory ni Gov. Cecilia Araneta Marcos kadagiti amin nga opisina ti Provincial Government of Ilocos Norte ken dagiti Local Government Units maipanggep iti town fiesta ken nagduduma a selebrasion ita a panawen ti kalgaw.
Inbatadna a saan laeng nga iti ili ti Bangui ken Pagudpud ti fiesta season iti agdama ditoy probinsia no diket pakairamanan pay iti ili ti Badoc, Pinili, Currimao, Nueva Era, Paoay ken iti siudad ti Batac.
Inlawlawagna a napateg a mangaramid ti addang ti gobierno probinsial kas sungbat iti mapaspasaran a krisis ken agbalin a sensitibo iti daytoy.
Innayonna nga ikonkonsiderar dagiti dadduma a lokal a gobierno a pagbalinen a simple dagiti town fiesta dagitoy imbes nga isayangkat iti nakadawyan a wagas.
